Skiptinám
- Skiptinemar eiga að sækja um námslán vegna náms í þeim skóla sem þeir eru skráðir í á Íslandi og munu væntanlega útskrifast frá. Ekki sækja um lán vegna náms erlendis.
Skiptinemar geta óskað eftir að fá sömu framfærslu og gildir í því landi eða skóla sem þeir heimsækja. Hægt er að gera það með sérstakri rafrænni skiptinemaumsókn inn á Mitt svæði. Til að slík beiðni sé afgreidd, verður að hafa borist staðfesting til sjóðsins á skiptináminu. LÍN fær á hverju ári senda lista yfir væntanlega Erasmus- og Nordplus-skiptinema, en skólarnir á Íslandi verða sjálfir að senda staðfestingar fyrir aðra skiptinema (upplýsingar verða að innihalda nafn og kennitölu, námsstað, tímabil og hvort styrkur sé veittur eða ekki).- Styrkur sem veittur er vegna skiptinámsins kemur ekki til lækkunar á námslánum þar sem Nordplus- og Erasmus-styrkþegar eiga ekki rétt á ferðaláni frá LÍN. Aðrir skiptinemar sem ekki fá styrk, geta sótt um ferðalán hjá sjóðnum.
- Sömu námskröfur eru gerðar til skiptinema eins og gerðar eru til þeirra í náminu á Íslandi. Fullt nám á skólaári telst vera 60 ECTS-einingar, en ljúka þarf a.m.k. 18 ECTS-einingum á skólaárinu til að eiga rétt á námsláni.
- Ekki senda námsárangur erlendis frá beint til LÍN, heldur skal senda hann til skólans á Íslandi sem metur hann inn í námið hér og staðfestir svo við LÍN.
- Skiptinemar eiga rétt á því að láta taka tillit til námskeiða umfram þann heildareiningafjölda sem þarf til lokaprófs, að hámarki þó 18 ECTS-einingar.
- Ef skiptinemar fara til Norðurlandanna og verða að færa lögheimili sitt þangað, þá er æskilegt að þeir tilnefni einhvern tengilið hér á landi sem getur tekið við bréfasendingum frá sjóðnum ef til þess kemur.
