Close contact us

Hafa samband

Nafn
Kennitala
Netfang
Skilaboð

L-05/2006 - Námsframvinda - beiðni um undanþágu vegna veikinda

Úrskurður

Ár 2006, miðvikudaginn 21. júní, kvað málskotsnefnd Lánasjóðs íslenskra námsmanna upp svohljóðandi úrskurð í málinu nr. L-5/2006.

Kæruefni

Með kæru dags. 28. mars 2006, sem barst málskotsnefnd þann 1. apríl 2006, kærði kærandi þá ákvörðun stjórnar LÍN sem staðfest var af stjórn sjóðsins þann 8. maí 2006 að synja henni um undanþágu frá námsframvindureglum sjóðsins vegna veikinda og erfiðra aðstæðna á heimili kæranda.

Með bréfi dags. 25. apríl 2006 var stjórn LÍN tilkynnt um fram komna kæru og stjórninni gefinn kostur á að tjá sig um hana. Svarbréf stjórnar LÍN er dags. 8. maí 2006. Í því kemur réttilega fram að enginn úrskurður stjórnar LÍN liggi fyrir í málinu, en í stað þess að krefjast frávísunar málsins frá málskotsnefndinni úrskurðaði stjórnin í málinu og staðfesti fyrri ákvörðun sjóðsins.

Með bréfi dags. 9. maí 2006 var kæranda kynnt efni svars stjórnar LÍN og henni gefinn kostur á að tjá sig um það. Ekkert svar barst frá kæranda.

Málsatvik og ágreiningsefni

Stuttu eftir að kærandi hóf nám sitt í snyrtifræði í Snyrtiskólanum í Kópavogi, var dóttur hennar nauðgað af hópi manna. Afleiðingar þessa urðu m.a. þær að dóttirin var vistuð á barna- og unglingageðdeild auk þess sem fjölskyldan þurfti að flytjast búferlum frá Keflavík í Kópavog. Allt þetta mál hafði mikil áhrif á fjölskylduna og misstu kærandi og eiginmaður hennar mikið úr námi vegna þessa. Eiginmaður kæranda fékk aukalán vegna þessa en ekki kærandi.

Af hálfu stjórnar LÍN kemur fram að skv. 1. mgr. 6. gr. laga nr. 21/1992 um LÍN komi fram að námslán skuli aldrei veitt fyrr en námsmaður hafi skilað vottorði um tilskilda skólasókn og námsárangur. Þá vísar stjórn LÍN einnig til 2. mgr. gr. 2.3.2. í úthlutunarreglum sjóðsins en þar kemur fram að skilyrði þess að námsmaður eigi rétt á auknu svigrúmi við mat á námsframvindu sé að hann hafi áður skilað fullnægjandi árangri í lánshæfu námi. Þá kemur enn fremur fram í þeirri grein að námsmaður sem ekki hafi skilað fullnægjandi námsárangri í lánshæfu námi eigi þó rétt á auknu svigrúmi vegna lánshæfs náms, ef hann skili fullnægjandi árangri á næsta misseri eftir að hann þurfi á svigrúminu að halda. Á þetta benti LÍN í afgreiðslu sinni á erindi kæranda.

Niðurstaða

Samkvæmt 1. mgr. 6. gr. laga nr. 21/1992 skal aldrei veita námslán fyrr en námsmaður hefur skilað vottorði um tilskilda skólasókn og námsárangur. Þá kemur fram í 2. mgr. gr. 2.3.2. í úthlutunarreglum LÍN að skilyrði fyrir því að námsmaður eigi rétt á auknu svigrúmi skv. greininni sé að hann hafi áður skilað fullnægjandi árangri í lánshæfu námi. Fyrir liggur að utanaðkomandi ófyrirséðar aðstæður ollu því að kærandi gat á fyrsta námsmisseri sínu í Snyrtiskólanum í Kópavogi ekki sýnt fullnægjandi árangur skv. skilgreiningum LÍN. Ekki er að finna heimildir fyrir því í lögum eða úthlutunarreglum að hægt sé að komast hjá tilvitnaðri lagagrein eða nefndri grein í úthlutunarreglum nema nemandi sýni fullnægjandi námsárangur á næstu önn eftir að nám hefst, þ.e. á annarri námsönn. Samkvæmt upplýsingum frá LÍN hefur kærandi ekki sýnt fullnægjandi námsárangur á vorönn 2006.

Með vísan til framanritaðs er niðurstaða stjórnar LÍN frá 8. maí 2006 í máli kæranda.

Úrskurðarorð

Ákvörðun stjórnar LÍN í máli kæranda frá 8. maí 2006 er staðfest.

Til baka